Македонија до 21 година утре игра против соодветната селекција на Фарските Острови, па на 15. ноември ја пречекуваме Данска која според Бабунски е најсилната селекција во нашата група.
Селекторот вели дека најважно е да се победи репрезентацијата на Фарските Острови, па подоцна мислите ќе се насочат кон Данска.
"Се подготвуваме внимателно за двете средби. Репрезентацијата на Ф. Острови според нашите анализи не е ни малку наивна екипа и затоа сериозно работиме на играта на нашиот тим како и на воочување на слабостите на противникот" - вели Бабунски.
"За нас најважно е да забележиме победа со која ќе бидеме во посакуваната позиција за многу потешкиот дуел со репрезентацијата на Данска која според мене е најсилна во групата".
"Добро е што во нашите редови немаме повредени играчи , значи сите оние со кои работевме во изминатата година ни се на располагање со исклучок на Ферхан Хасани кој првите три дена ќе работи со А-тимот а потоа в сабота ќе ни се приклучи нам за дуелот со данците. Тоа е желба на селекторот Тошак и ние ќе ја почитуваме бидејќи А-тимот секогаш има предност без разлика дали се работи за квалификациски или пријателски дуел."
Бабунски се осврна и на неговиот статус во сениорскиот тим и разните шпекулации во фудбалската јавност.
" Јас само ги спроведувам упатствата од раководството на ФФМ и барањето на Џон Тошак да бидам дел од стручниот штаб , пред се да му помогнам во подоброто запознавање со репрезентативците и што е поважно во пренесувањето на неговите идеи и барања кај фудбалерите".
"Мислам дека непотребно се форсираат некои тврдења за подметнување на играчи, или дека имало „случај" Хасани. Ние работиме исклучиво за доброто на македонскиот фудбал и резултатите на националните екипи".
" Јасно е дека за мене како селектор на репрезентацијата до 21г. е важно да ги имам на располагање сите млади играчи кои ми се потребни , така беше и со Хасани кој не отпатува за Ерменија бидејќи паузираше поради замор и повреда на подготовките, но изрази потоа желба да помогне колку може на дуелот со Србија на кој постигна и гол".
"Тврдам дека дел од играчите од младата селекција имаат потенцијал и според своите карактеристики се многу покорисни од некои репрезентативци за кои постојано читам по медиумите и од тие причини јас вклучив некои од нив во А-тимот на пријателскиот дуел со Азербејџан. Потоа по доаѓањето на Тошак на функцијата му ги препорачав и нему".
"Тошак е искусен тренер и славно фудбалско име и сигурно има зацртано план по кој работи. Мислам дека кога добро ќе ги запознае и ќе им пружи шанса на сите потенцијални репрезентативци ќе селектира 20-тина од нив со кои ќе стартува во следниот квалификациски циклус-рече Бабунски".