Репрезентативецот на Шпанија одлично ја започна кариерата на Стемфорд Бриџ, постигна четири погодоци во првите три кола и ја доби наградата за Играч на Месецот во Премиер лигата во август.

Диего Коста во саботата продолжи онаму каде што застана пред две недели, и забележа хет-трик во победата од 4-2 над Свонси.

Напаѓачот вели дека заслуга за неговата извонредна голгетерска форма имаат соиграчите, и предупредува дека ќе има моменти кога нема да може да ги тресе противничките мрежи.

„Различно е за секој напаѓач кој доаѓа тука” – вели Коста.

„Секој напаѓач има сопствен стил на игра, свои јаки страни и различен тим позади него”.

„Тоа е многу важно. Доколку немате соодветен тим зад вас, нема да можете сам да правите се. Многу зависите од тимот”.

„Се обидувам да играм најдобро што можам, и се надевам дека ќе продолжам да ги тресам противничките мрежи. Но ќе има моменти кога нема да можам да постигнувам голови, таков е фудбалот”.