Категорија: СП 2014 13.06.2014 23:08
Вистински кошмар за шампионот, Холандија ја нокаутираше Шпанија во првото коло од групната фаза, фантастични 5-1 за портокаловите.
Прекрасен натпревар за Холандија и сите неутрални љубители на фудбалот, но вистински дебакл за светскиот шампион кој ниту во најлошите сни не можеше да го предвиди ова.
А натпреварот не започна лошо за Шпанците, Диего Коста изнуди пенал, Чаби Алонсо реализираше за водство од 1-0.
Пред крајот на првото полувреме, мајсторија на Робин ван Перси, убава асистенција од Блинд, а напаѓачот на Јунајтед постигнува летечки погодок со глава за изедначување.
Во вториот дел Робен ја изигра одбраната на Шпанија и постигна гол за комплетен пресврт и водство на Холандија од 2-1.
Нова контроверзна судиска одлука се случи во 65. минута кога Де Вриј постигна гол за 3-1, на погодокот му претходеше фаул од Ван Перси врз Касиљас кој не беше досуден од Никола Рицоли.
До крајот на натпреварот Ван Перси и Робен погодија уште по еднаш за петарда во мрежата на Икер Касиљас.
Доколку беа поприсебни во завршницата, Холанѓаните можеа уште да ја тресат мрежата на размонтираната Шпанија, но и резултатот од 5-1 е неверојатен.
Моќен старт на светското првенство за Холандија, Шпанија е нокаут, останува да видиме дали ќе се разбуди во дуелите против Чиле и Австралија.