Утре со почеток од 20.00 часот на Националната арена Филип Втори, Работнички и Тетекс ќе се борат за трофејот во Купот на Македонија.

 

Работнички е фаворит и бранител на трофејот, но Тетекс се надева дека ќе се повтори натпреварот од пред пет години кога токму овие две екипи играа во финалето а Тетовчани го кренаа трофејот.

 

„Работнички е фаворит, односот на табелата покажува дека играме против најкомпактниот тим во Македонија. Тоа за нас е дополнителен мотив, ќе го дадеме максимумот да го повториме успехот од пред две години. Верувам дека натпреварот ќе биде интересен и динамичен. Ние ќе играме за нашата гордост, за градот Тетово и навивачите. Утрешниот натпревар е голем предизвик за нас и ќе се обидеме да се надигруваме. Нека победи подобриот" - истакна на прес конференцијата Горазд Михајлов, тренерот на Тетекс.

 

Но, Работнички си има свои сметки и се надева дека трофејот од Купот ќе остане во нивните витрини.

 

„Големо е задоволството што повторно сме дел од финалето на Купот на Македонија.  Ќе дадеме се од себе да го одбраниме трофејот освоен лани. Иако веќе е второлигаш, Тетекс заслужува респект. Во последниот преоден рок донесоа нови фудбалери, а пристигна и Горазд како тренер. Не чувствуваме притисок, во фудбалот има победи и порази, ако победиме значи сме завршиле одлична работа, ако триумфира Тетекс ќе им честитаме" -изјави тренерот на Работнички, Игор Ангеловски.