Напаѓачот, кој во саботата го прослави 38. роденден, на гостувањто на Етихат Стадионот го совлада Џо Харт во 23. минута и го надмина рекордот на Рајан Гигс.

Поранешниот фудбалер од средниот ред на Манчестер Јунајтед имаше 37 години и 290 дена кога постигна гол против Бенфика на натпревар одигран во сезоната 2011/12.

Франческо Тоти, за кого ова беше прв гол на англиско тол, вели дека е среќен за рекордот што го поставил, но додава дека за него поважни се успесите на Рома.

„Тоа е историски и важен гол, но повеќе за тимот отколку за мене” – рече ’Принцот на Рим’ по крајот на натпреварот.

„Задоволен сум од перформансите што ги прикажавме. Дојдовме тука да играме отворено, и мислам дека ова беше една од најдобрите партии на Рома во Европа”.

„Горд сум што станав највозрасниот стрелец во историјата на Лигата на Шампионите, но се надевам дека ќе продолжам и нема да застанам тука. Кажав и претходно, имам 38 години но не се чувствувам така”.

„Освоивме важен бод, иако можеби можевме дури и да победиме. Имавме пет или шест шанси за гол кој ќе ни донесеше предност”.

Во разговор со Sky Sport Italia тој додаде: „Уште на стартот бевме во негатива но успеавме да се вратиме, и тоа не беше лесно, игравме против еден од најсилните тимови во Европа”.

„Покажавме дека вредиме и што можеме да сториме во Лигата на Шампоните”.

„Нашата цел е да одиграме најдобро што умееме, да се обидеме да ја поминеме групата, а знаеме дека тоа не е лесно кога сте во група со Баерн и Манчестер Сити, кои се на наше ниво а можеби и подобри од нас”.

„Со ваква игра, можеме да се пласираме во нок-аут фазата”.