Утре на програмата е мега пресметката помеѓу Реал Мадрид и Баерн Минхен, голем дуел меѓу титаните во европскиот фудбал.

Овие два тима се сретнаа и во полуфиналето во 2012 година, тогаш поуспешни беа Германците.

„Не размислуваме за тоа што се случило пред две години бидејќи сега ситуацијата е поинаква. Треба да одиграме перфектен натпревар. Треба да знаеме како да се браниме и да напаѓаме добро кога топката е во нас" - вели Чаби Алонсо.

„Баерн е голем ривал, но ние сме во добра форма и никој не е фаворит. Во последните три години играме во полуфиналето, сега сакаме да одиме чекор понапред".

Кристијано Роналдо се враќа по паузата поради повреда и веројатно ќе биде дел од утрешниот натпревар, а од таборот на Реал Мадрид се надеваат дека ќе го имаат и Герет Бејл кој поради настинка го пропушти синоќешниот тренинг.

„Роналдо ќе игра ако е 100% фит. Тренерот, стручниот штаб и самиот тој ќе одлучат" - вели Алонсо.

„Роналдо може да креира шанси и да постигнува голови. Тој е многу важен за нас".

„Исто така и Герет Бејл е многу корисен за нас, среќни сме што го имаме во нашиот тим, игра фантастично и покрај тоа што ова е негова прва сезона".